Nambu-bully ng ibang tao ang aking estudyante
Bilang guro, ang pagharap sa pambu-bully ay nangangahulugang pagtulong sa lahat ng estudyanteng sangkot sa sitwasyon. Malaman kung paano maging proactive at tugunan ang sitwasyon kung inakusahan ng pambu-bully ang isa sa iyong mga estudyante.
Magkaroon ng bukas at hindi mapanghusgang pag-uusap.
Ang mga nambu-bully na bata ay ginagawa ito nang may iba’t ibang dahilan. Para makakuha ng mas magandang pag-unawa sa motibo o paliwanag ng estudyante, manatiling naroon at makinig nang may malasakit. Huwag na ikaw mismo ang magsasabi sa dapat sabihin ng iyong estudyante o magpasya.
Ang kalmado at komportableng setting ay may malaking epekto para magsalita ang iyong estudyante. Paghandaan ang pag-uusap para subukang iwasang maramdaman ng iyong estudyante ng hinuhusgahan siya. Huwag gumamit ng masasakit o nang-aakusang salita. Ipaalam sa iyong estudyante na nandiyan ka para sa kanya at gusto mong tumulong na maghanap ng resolusyon sa problema.
Imbestigahan ang insidente.
Magsiyasat nang mabuti para malaman mo kung ano ang pinakamagandang magagawa. Alamin kung ano ang mismong nangyari, kung gaano na katagal nangyayari ang pambu-bully at kung may anumang nangyari simula nang isumbong ito.
Kausapin ang mga sangkot na tao sa pamamagitan ng pakikipag-usap muna sa taong na-bully, pagkatapos ay ang mga saksi, at panghuli ang tao (o grupo ng mga tao) na inakusahang nambu-bully. Kung sangkot ang grupo ng mga estudyante sa pambu-bully, siguruhing hindi nila makakausap ang isa’t isa sa oras ng imbestigasyon.
Tugunan ang mga sitwasyon na nangangailangan ng agarang pansin.
Kung may anumang dahilan para maniwala na nasa panganib ang isang estudyante, isumbong kaagad ang insidente sa awtoridad sa iyong paaralan. Siguraduhing ligtas ang estudyanteng na-bully, ang nambully at sinumang saksi hanggang sa maresolba ng mga awtoridad ang sitwasyon. Kung masyadong nainis ang iyong estudyante o nagpapakita siya ng mga palatandaan ng pananakit sa sarili, huwag siyang iwan nang mag-isa. Humingi agad ng tulong.
Magplano.
Batay sa nalaman mo, magpasya para sa mga susunod na step. Kahit na malalaman mo na hindi kailangang isumbong ang insidente, makipagtulungan sa iyong estudyante para sa pinakamagandang paraan para humingi ng paumanhin. Kung kailangang isumbong ang insidente, gawin kung ano ang kinakailangan para masigurong ligtas ang lahat ng partido. Kung saan maaari, hilingin sa mga staff member, tulad ng mga social worker, psychologist o ang punong-guro na suportahan ka at ang iyong mga estudyante.
Sabihin ang mga patakaran ng iyong paaralan at paalalahanan ang iyong estudyante na hindi katanggap-tanggap ang anumang uri ng pambu-bully at na maaaring may mga kahihinatnan ito. Isama ang mga magulang ayon sa patakaran ng iyong paaralan.
Mangumusta.
Magbigay ng patuloy na suporta pero huwag mong akuin ang lahat ng ito. Panatilihing kabilang ang iba pang staff member o expert sa pagtulong sa iyong pamahalaan ang insidente.
Kumustahin ang iyong mga estudyante sa loob ng ilang araw, isang linggo at kahit isang buwan pagkatapos na maisumbong ang sitwasyon para malaman ang kalagayan nila at tanungin sila ng:
- Naayos ba ang sitwasyon?
- Nagkaroon ba ng anumang paghihiganti?
- Komportable ba sila sa paaralan?
- Kumusta ang kanilang relasyon sa iba pang (mga) estudyanteng sangkot?
Tiyaking mayroong network ang iyong estudyante na mapagkukunan ng suporta. Maaari siyang magbenepisyo mula sa pagpunta sa tagapayo ng paaralan. Maaari ring makatulong ang pangungumusta sa mga magulang ng estudyante.
Alamin kung mayroon pang mga paraan para tumulong na maghanap ng mga pagkakataon sa komunidad, tulad ng mga after-school program o mga event para sa asal at kalusugan na nakatuon sa kabataan.
Magbahagi ng mga lesson o resource at magtaguyod ng mga positibong relasyon. Magturo ng mga kakayahan sa mahusay na pakikisalamuha, tulad ng kamalayan sa sarili, pamamahala ng sarili, social awareness, pagbuo ng relasyon at responsableng mga kakayahan sa paggawa ng desisyon.
I-follow Kami
