Bahagi ng aming Mga Pamantayan ng Komunidad ang mga sumusunod na patakaran.

Patakaran sa Sekswal na Pananamantala, Pang-aabuso at Paghuhubad ng Bata

Hindi pinapayagan ng Facebook ang anumang content o aktibidad na nananamantala o inilalagay sa panganib ang mga bata. Malinaw na ibinabalangkas ng Patakaran sa Sekswal na Pananamantala, Pang-aabuso at Paghuhubad ng Bata ang content at mga larawang itinuturing bilang paglabag sa patakarang ito at sa aming Mga Pamantayan ng Komunidad, pati na rin ang mga aksyong gagawin namin kung nalamang nilalabag ng isang tao ang mga patakarang ito

Patakaran sa Sekswal na Pananamantala sa Nasa Hustong Gulang

Kinikilala namin ang kahalagahan ng Facebook bilang isang lugar para pag-usapan at magbigay ng pansin sa sekswal na karahasan at pananamantala. Bilang pagsusumikap na makagawa ng lugar para sa ganitong pag-uusap at para magtaguyod ng ligtas na kapaligiran, pinapayagan namin ang mga biktima na ibahagi ang kanilang mga karanasan, pero tinatanggal namin ang content na nagpapakita, nagbabanta o nagtataguyod ng sekswal na karahasan, sekswal na pang-aatake, o sekswal na pananamantala. Tinatanggal din namin ang content na nagpapakita, nag-aadvocate o nangangasiwa ng mga sekswal na gawain sa mga partidong hindi pumayag na makibahagi rito para maiwasan ang pangangasiwa ng mga sekswal na gawain na walang pahintulot.

Patakaran sa Pagpapakamatay at Pananakit sa Sarili

Sumasangguni kami sa mga eksperto tungkol sa pagpapakamatay at pananakit sa sarili para makapagbigay ng impormasyon sa ating paggawa ng mga patakaran at pagpapatupad nito, at nakikipagtulungan kami sa mga organisasyon sa buong mundo para tulungan ang mga taong may pinagdadaanan. Bagaman hindi namin pinapayagan ang mga tao na ipagdiwang o itaguyod ang pagpapakamatay o pananakit sa sarili, ito man ay sinasadya o hindi sinasadya, pinapayagan namin ang mga tao na talakayin ang mga paksang ito dahil gusto naming maging lugar kung saan pwedeng ibahagi ng mga tao ang kanilang mga karanasan, magbigay sila ng kamalayan tungkol sa mga isyung ito, at humingi ng suporta mula sa isa’t isa. Inaalis namin ang anumang content na nanghihikayat ng pagpapakamatay o pananakit sa sarili, kasama ang gawa-gawang content tulad ng mga meme o larawan at anumang content tungkol sa pananakit sa sarili na madugo o marahas, anuman ang konteksto nito.

Patakaran sa Pananamantala ng Tao

Tinatanggal namin ang content at pinipigilan namin ang aktibidad na nangangasiwa o nagko-coordinate ng pananamantala sa mga tao, kasama ang pagpupuslit ng tao o human trafficking. Tinutukoy namin ang human trafficking bilang negosyo kung saan ipinagkakait ang kalayaan ng isang tao para pagkaperahan. Ito ay pananamantala sa mga tao upang pilitin silang lumahok sa pakikipagtalik para sa pera, pagtatrabaho o iba pang gawain na labag sa kanilang kagustuhan. Umaasa ito sa panlilinlang, pamimilit at pamumuwersa, at minamaliit nito ang pagkatao sa pamamagitan ng pagkakait sa kanila ng kanilang kalayaan habang ito ay pinakikinabangan ng iba sa ekonomikal o materyal na paraan.

Tinutukoy ng United Nations ang human smuggling bilang pagkuha o pangangasiwa ng hindi ligal na pagpasok sa isang bansa mula sa ibang bansa. Kung walang pamumuwersa o pamimilit, posible pa rin itong magresulta sa pananamantala ng mahihinang tao na sinusubukang umalis ng kanilang pinagmulang bansa, na kadalasang humahangad na magkaroon ng mas magandang buhay.

Bagaman kailangan naming mag-ingat na huwag pag-isahin ang trafficking at smuggling, maaaring maging magkaugnay ang mga ito at magpakita ng overlap.

Patakaran sa Pambu-bully at Pangha-harass

Itinuturing ang pambu-bully bilang anumang aktibidad kung saan gumagawa ang isang tao ng mga banta online o nagsasagawa ang isang tao ng mapaminsalang gawi laban sa isang tao online. Kasama sa patakarang ito ang mga proteksyon laban sa maramihang pangha-harass sa mga indibiduwal. Nangyayari ang pambu-bully at pangha-harass sa maraming lugar at sa maraming iba’t ibang paraan. Mahalaga ang konteksto para maunawaan kung pakiramdam ng isang tao na hindi siya ligtas mula sa gawing ito. Ibinabalangkas namin kung paano amin tinutukoy ang mga gawing ito mula sa isa't isa para gumawa ng mas ligtas na Facebook.

Dagdag pa sa aming mga alituntunin sa patakaran, kasama sa aming seksyon sa pagpigil sa pambu-bully ang mga tool at resource para sa mg teen, magulang, at tagaturo.

Patakaran sa Hate Speech

Tinutukoy namin ang hate speech bilang direktang pang-aatake sa mga tao – sa halip na mga konsepto o institusyon – batay sa tinatawag naming mga protektadong katangian: lahi, etnisidad, bansang pinagmulan, kapansanan, kinabibilangan na relihiyon, caste, sekswal na oryentasyon, kasarian, kinikilalang kasarian at malubhang sakit. Ibinabalangkas ng patakaran sa Hate Speech ang content na itinuturing namin bilang Hate Speech at aalisin ang mga ito sa aming mga platform.

Ipinagbabawal ang hate speech laban sa LGBTQ+ community. Para ipatupad ang aming mga pamantayan sa kaligtasan para sa LGBTQ+ community, gumawa kami ng mga patakaran na kasama, bilang minimum, ang pag-alis ng content na nilalayon para maliitin o ipahiya ang isang tao dahil sa kanilang sekswal na oryentasyon o pagkakakilanlan sa kasarian.

Mga Paglabag sa Privacy at Patakaran sa Privacy ng Image

Ibinabalangkas ng mga patakarang ito kung paano namin pinapangalagaan ang personal na impormasyon na nauugnay sa iyong pagkakakilanlan at aktibidad. Ipinapatupad ng patakarang ito ang aming pangakong huwag payagan ang personal na impormasyon ibinahagi tungkol sa iyo nang walang pahintulot at pigilan ang pisikal o pinansyal na pinsala bilang resulta ng personal na impormasyong ibinahagi sa aming mga teknolohiya.

Patakaran sa Marahas at Graphic na Content

Inaalis namin ang content na partikular na marahas o graphic, tulad ng mga video na nagpapakita ng pagputol ng mga bahagi ng katawan, nakikitang laman-loob o mga nasunog na katawan. Inaalis namin ang content na naglalaman ng mga pang-sadistang puna sa imagery na naglalarawan ng pagdurusa ng mga tao o hayop.

Alam naming may iba't ibang sensitivity ang mga tao tungkol sa graphic at marahas na imagery. Para sa dahilan na iyon, naglalagay kami ng warning label sa ilang graphic o marahas na imagery para alam ng mga tao na maaaring sensitibo ito bago sila mag-click. Nire-restrict din namin ang kakayahan ng mga user na wala pang 18 para tingnan ang nasabing content.